កំពត៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានលើកឡើងថា ក្នុងឆ្នាំ២០២២ នេះការប្រមូលចំណូលពន្ធដារ និងគយ បានចំនួនជាង៦ពាន់លានដុល្លារ ពោលគឺលើសពីផែនការជាង ២៥ភាគរយ។
សម្តេចតេជោបានបញ្ជាក់ថា ឆ្នាំ២០២២នេះ អគ្គនាយកដ្ឋានពន្ធដារបានប្រមូលពន្ធចំនួន ៣ ៤៣៧លានដុល្លារ ស្មើនឹង ១២១,៩៣ភាគរយ។ ចំណែកអគ្គនាយកដ្ឋានគយ និងរដ្ឋាករកម្ពុជា ប្រមូលបាន ២ ៦៧០លានដុល្លារ ស្មើនឹង ១០៤,១៥ភាគរយ។
ថ្លែងក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរគឺ ផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពតនិងខេត្តកែប នាព្រឹកថ្ងៃទី៣០ ខែធ្នូ ឆ្នាំ២០២២ សម្តេចតេជោបានថ្លែងដូច្នេះថា៖ «នេះមិនទាន់គិតពីចំណូលមិនមែនសារពើពន្ធដែលឆ្នាំនេះជឿថាវាកើន។ ពីព្រោះគ្រាន់តែភ្ញៀវទេសចរ ២លាននាក់ យើងនឹងមានប្រាក់ ៦០លានដុល្លារ»។
សម្តេចតេជោបានគូសបញ្ជាក់ថា ចំណូលពន្ធដារ និងពន្ធគយដែលរាជរដ្ឋាភិបាលសម្រេចបាន គឺសម្រាប់ផ្តល់ឱកាសឱ្យរដ្ឋាភិបាលអាចវិនិយោគលើផ្លូវថ្នល់ ហេដ្ឋារចនាសម្ព័ន្ធចាំបាច់នានា និងទៅលើថវិកាបដិភាគនៃគម្រោងដែលបរទេសជួយមកកម្ពុជា។
នាយករដ្ឋមន្ត្រីបានអំពាវនាវដល់អាជ្ញាធរគ្រប់លំដាប់ថ្នាក់ បន្តគាំទ្រផ្នែកប្រមូលពន្ធដារ និងពន្ធគយប្រកបដោយប្រសិទ្ធភាព។
គូសបញ្ជាក់ថាក្នុងឆ្នាំ២០២១ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានចំនួន ២ ២៩៤លានដុល្លារ ដែលស្មើនឹង ៩៧,១ភាគរយនៃផែនការ ខណៈអគ្គនាយកដ្ឋានពន្ធដារ ប្រមូលចំណូលពន្ធបាន ២ ២៤៣លានដុល្លារលើសផែនការ ២៤,០២ភាគរយ៕
